नागपूर : दहा वर्षांपूर्वी दोघांची ओळख झाली. दोघांत मैत्री झाली. मैत्रीचे रूपांतर प्रेमात झाले. त्यांनी लग्न करण्याचा निर्णय घेतला. कुटुंबीयांच्या सहमतीने दोघांनी प्रेमविवाह केला. दोघांचाही संसार सुरळीत सुरू होता. मात्र, मूलबाळ होत नसल्यामुळे दोघेही निराश होते. याच कारणाने ती तणावात राहू लागली. यातून तिने दुर्दैवी निर्णय घेतला.

नैराश्‍यात असलेल्या विवाहितेने गळफास घेऊन आत्महत्या केली आणि एका प्रेमविवाहाचा करुण अंत झाला. ही दुर्दैवी घटना हुडकेश्‍वरमध्ये उघडकीस आली. संगीता कुणाल कांबळे (वय २९, न्यू नेहरूनगर) असे आत्महत्या केलेल्या वाहितेचे नाव आहे. पोलिसांनी दिलेल्या माहितीनुसार, कुणाल कांबळे महापालिकेच्या कचरा उचलणाऱ्या वाहनावर काम करतात. त्यांची दहा वर्षांपूर्वी संगीता या उच्चशिक्षित तरुणीशी ओळख झाली. दोघांचे सूत जुळले. प्रेमविवाह केल्यानंतर दोघांचाही संसार सुरळीत सुरू होता. मात्र, मूलबाळ होत नसल्यामुळे दोघेही निराश होते. त्यासाठी त्यांनी चांगल्या डॉक्टरांकडे उपचारही घेतले. 

दरम्यान, कुणाल याला दारूचे व्यसन जडले. तो नेहमी दारू पिऊन घरी यायला लागला. त्यामुळे घरात पती-पत्नीत वाद होऊ लागले. नातेवाइकांनी समजूत घातल्यानंतर वाद निवळला. कुणालने दारूही सोडली. दुसरीकडे, मूल होत नसल्याने संगीता नाराज राहायला लागली. एकलकोंडी झालेल्या संगीताच्या स्वभावात फरक पडला. नशिबाला दोष देत संगीताने आत्महत्येचा निर्णय घेतला. बुधवारी सकाळी कुणाल कामावर निघून गेले आणि तिचे सासरे फिरायला बाहेर गेले. या वेळात संगीताने घरात सिलिंग फॅनला ओढणीने गळफास लावत आत्महत्या केली. 

हेही वाचा : ‘मम्मी-पप्पा मुझे माफ करो' असे म्हणत तिने संपवले जीवन...पण असे काय घडले; जाणून घ्या

सायंकाळी कुणाल घरी आला. त्याने संगीता यांना हाक दिली. प्रतिसाद न मिळाल्याने खिडकीतून डोकावून बघितले असता ती गळफास लावलेल्या अवस्थेत आढळून आली. त्याने शेजाऱ्यांच्या मदतीने दरवाजा तोडला. संगीताला खाली उतरवून मेडिकलमध्ये नेले. हुडकेश्‍वर पोलिसांनी आकस्मिक मृत्यूची नोंद केली आहे.

सासऱ्यांशी झाला वाद
पोळ्याच्या पाडव्याला कोणत्यातरी कारणावरून संगीताचा सासऱ्यासोबत वाद झाला होता. तेव्हापासून दोघेही एकमेकांशी बोलत नव्हते. या गोष्टीवरून घरातील वातावरण बिघडले होते, अशी माहिती पोलिसांनी दिली.

(संपादन : मेघराज मेश्राम)